2023 жылғы 8 желтоқсан таңы Сыр өңірінің медицинасы үшін айтулы жаңалықпен атты. Өйткені араға 9 жыл салып Көпбейінді облыстық ауруханада бүйрек трансплантациясы жасалды. Аталмыш күрделі ота 25 жастағы жергілікті азаматтың өмірін құтқарды. Үш жылдан бері бүйрек аппаратына тәуелді болған науқасқа туыстық бауыр трансплантациясы жасалып, 5 сағатқа созылған ота сәтті өтті. Қазіргі таңда науқас пен донордың жай-күйі бір қалыпты. Олар дәрігерлердің күнделікті бақылауында болмақ.
Соңғы 11 жылда елімізде ағза трансплантациясы жоғары деңгейде жүзеге асып жатыр. Осы уақытқа дейін 3 мыңға жуық трансплантация жасалған, оның ішінде негізгілері – бүйрек, бауыр, жүрек, өкпе, ұйқыбез трансплантациялары. Дегенмен, бұл оталардың 90 пайызға жуығы тірі донор арқылы іске асырылады. Соның ішінде әлемде туыстық донор арқылы ота жасау тәсілі кеңінен қолданысқа енген. Бұл ота бүйрек жетіспеушілігіне шалдыққан науқастар үшін өте тиімді. Мінекей, бүгін осы туыстық донор арқылы 25 жастағы қызылордалық азаматқа бүйрек трансплантациясын жасадық.
Ота сәтті өтті. Бұл трансплантацияға көпбейінді облыстық аурухананың дәрігерлері қатысып, тәжірибе алмасты. Қызылордада созылмалы бүйрек жетіспеушілігі бойынша 600-ден адам есепте тұр. Оның ішінде 370 науқас гемодиализ алады. Қызылорда облысы бойынша күту парағында бүйрек трансплантациясына мұқтаж 191 науқас бар. Сондықтан бүйрек ауыстыру отасын алдағы жылы да жалғастыру жоспарымызда, – деді А.Н. Сызғанов атындағы Ұлттық ғылыми хирургия орталығының Басқарма төрағасы, медицина ғылымдарының докторы, профессор Болатбек Баймаханов.
